Rais wa Kenya, William Ruto, ameeleza kukerwa kwake baada ya umeme kukatika mara kadhaa wakati akifanya mahojiano ya moja kwa moja na waandishi wa habari katika Ikulu Ndogo ya Kisumu, Jumatatu, Septemba 14, 2026.
Hitilafu hiyo ilisababisha mahojiano hayo kusitishwa kwa muda na matangazo ya moja kwa moja kukatika. Ruto aligeukia wasaidizi wake na kuhoji kwa nini eneo hilo halikuwa limewekewa mfumo wa jenereta ili kuhakikisha shughuli zinaendelea bila usumbufu.
“Kwa nini msiweke eneo hili kwenye jenereta? Kwa nini msibadilishe taa ziende kwenye jenereta?” alihoji Ruto.
Katika tukio hilo, Ruto pia alikataa kuombewa radhi na waandishi wa habari, akisema yeye ndiye mwenye jukumu la kuhakikisha eneo analotumia kama Rais linaandaliwa ipasavyo.
“Si ninyi mnapaswa kuomba radhi, ni mimi kwa sababu mimi ndiye mwenye eneo hili. Nilipaswa kuwa nimejiandaa zaidi,” alisema.
Kukatika kwa umeme kulitokea wakati Rais huyo akijibu maswali kuhusu masuala mbalimbali ya kitaifa, ikiwemo maendeleo, mpango wa nyumba za gharama nafuu na changamoto ya upatikanaji wa umeme katika eneo la Nyanza.
Ruto alikiri kuwa wakazi wa Nyanza wamekuwa wakikabiliwa na kukatika kwa umeme mara kwa mara na akaomba radhi kwa hali hiyo.
Alisema Serikali imechukua hatua za kuharakisha ujenzi wa njia mpya za kusafirisha umeme kutoka Lessos pamoja na njia nyingine kupitia Bomet, ambazo zinalenga kuongeza uthabiti wa usambazaji wa umeme katika eneo hilo.
Kwa mujibu wa Rais Ruto, Serikali inatarajia kuona maboresho katika upatikanaji wa umeme kabla ya mwisho wa mwaka 2026, huku miradi hiyo ikitajwa kuwa sehemu ya juhudi za kuboresha huduma za msingi na kukuza shughuli za kiuchumi Nyanza.
Ruto yuko katika ziara ya siku nne katika eneo la Nyanza, ambako amekuwa akikagua na kuzindua miradi mbalimbali ya maendeleo, ikiwemo barabara na miundombinu ya usalama.
Tukio la kukatika kwa umeme wakati wa mahojiano ya moja kwa moja limeongeza mjadala kuhusu changamoto ya upatikanaji wa umeme nchini Kenya, huku suala la uhakika wa huduma hiyo likiwa miongoni mwa hoja zinazowakabili wananchi katika baadhi ya maeneo.